Əməkdaşımız Sumqayıtdakı partlayışlarla bağlı son məlumatları açıqladı

Bu gün səhər saatlarında Sumqayıt şəhərində iki partlayış hadisəsi baş verib.

İlk hadisə şəhərin 13-cü mikrorayon ərazisində yerləşən mənzildə qeydə alınıb. Partlayış hadisəsi nəticəsində 4-ü kişi, 2-si qadın olmaqla 6 nəfər xəsarət alıb. Yaralılar Sumqayıt Tibb Mərkəzinin nəzdində olan tibb müəssisələrinə təxliyə olunublar.

Sumqayıt Tibb Mərkəzinin Təcili Tibbi Yardım Xəstəxanasına ağır yanıq xəsarətləri ilə yerləşdirilən 1977 (kişi cinsli), 2007 (kişi cinsli) və 2010-cu il (qadın cinsli) təvəllüdlü şəxslərə zəruri tibbi yardımlar göstərilib. Onlar ixtisaslı tibbi yardımın göstərilməsi üçün Nərimanov Tibb Mərkəzinin nəzdində olan Yanıq Mərkəzinə təxliyə olunublar.

Təcili Tibbi Yardım Xəstəxanasına hospitalizasiya olunan 1952-ci il (kişi cinsli) təvəllüdlü şəxsə arterial hipertenziya səbəbi ilə zəruri tibbi yardımlar göstərilib. Təcili və təxirəsalınmaz tibbi yardım şöbəsində müalicəsi davam etdirilir, vəziyyəti stabildir.

1975-ci il təvəllüdlü (qadın cinsli) şəxsə sol ayağın yüngül kəsilmiş yarası diaqnozu təyin edilib. Sözügedən şəxs stasionar müalicədən imtina edib.

Uşaq Xəstəxanasına hospitalizasiya olunan 2008-ci il təvəllüdlü (kişi cinsli) şəxsə diz oynağının açıq yarası diaqnozu təyin edilib. Təcili və təxirəsalınmaz tibbi yardım şöbəsində müalicəsi davam etdirilir, vəziyyəti stabildir.

Digər hadisə isə Sumqayıt şəhəri, Sahil küçəsi, Novxanı bağlar massivində qeydə alınıb. Həyata keçirilən axtarış-xilasetmə tədbirləri nəticəsində dağıntılar altından 1-i kişi, 1-i qadın olmaqla 2 nəfər sağ çıxarılaraq Sumqayıt Tibb Mərkəzinin nəzdində olan Təcili Tibbi Yardım Xəstəxanasına hospitalizasiya olunub.

1949-cu il təvəllüdlü (kişi cinsli) şəxsə müxtəlif nahiyələrin I, II dərəcəli termiki yanığı diaqnozu, 1959-cu il (qadın cinsli) təvəllüdlü şəxsə əzilmiş, cırılmış yaralar diaqnozları təyin edilib.

1949-cu il təvəllüdlü şəxs ixtisaslı tibbi yardımın göstərilməsi üçün Nərimanov Tibb Mərkəzinin nəzdində olan Yanıq Mərkəzinə təxliyə olunub.

Hazırda digər şəxsin müalicəsi Reanimasiya şöbəsində davam etdirilir, vəziyyəti ağırdır.