Ev sahiblərini şoka salan hadisənin detalları | "Hamısını yandırdılar, qalanı da..." - Baku TV

Lənkəranın Göyşaban kəndində ev yanıb.

Kənd sakini Şamil Qurbanova məxsus ikimərtəbəli evin əşyaları yanaraq yararsız hala düşüb.

Mülk sahibinin anası iddia edir ki, evə girən şəxslər əvvəl oğurluq edib, sonra evi yandırıblar:

“Gəlib gördüm ki, ev külə dönüb. Yeyib-içiblər, hər şeyi talayıb, sonra da yandırıblar. Bütün ev-eşik pis günə düşüb. Buranı yenidən evə oxşatmaq üçün 20-30 min manat lazımdır”.

Daxili İşlər Nazirliyindən bildirilib ki, yanvar ayının 6-da Lənkəran rayonunun Göyşaban kəndi ərazisində yerləşən evlərin birindən oğurluq edilməsi, daha sonra həmin ünvanda yanğın hadisəsinin baş verməsi ilə bağlı polisə müraciət daxil olub. Hazırda həmin müraciət üzrə Lənkəran Şəhər-Rayon Polis Şöbəsində müvafiq araşdırma aparılır.

Qeyd edək ki, hadisə yerinə Fövqəladə Hallar Nazirliyinin Lənkəran Yanğından Mühafizə Hissəsinin texnikası və canlı qüvvəsi cəlb olunub. Qısa müddət ərzində yanğın söndürülüb. Vaxtında görülən tədbirlər nəticəsində evin tam yanmasının qarşısı alınıb.