Fikrət Məmmədovla bağlı məhkəmə hansı qərarı verdi? | Sumqayıtda qandonduran hadisə

Sumqayıtda ata və anasını qətlə yetirməkdə təqsirləndirilən Fikrət Məmmədovun cinayət işinin məhkəməsi başlayıb.

Sumqayıt Ağır Cinayətlər Məhkəməsinin hakimi Nurəddin Hüseynlinin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Dövlət ittihamçısı Samir Məmmədov çıxış edərək təqsirləndirilən şəxs barədə seçilmiş həbs qətimkan tədbirinin dəyişdirilmədən işin məhkəmə baxışına verilməsini təklif edib. Məhkəmə qısa müşavirədən sonra işin baxışa verilməsi ilə bağlı qərar qəbul edib. Məhkəmənin ilk baxış iclası avqustun 28-nə təyin edilib.

Qeyd edək ki, qətl 2024-cü ilin aprelində baş verib. Belə ki, Fikrət Məmmədov yaşadığı Sumqayıt şəhəri 41-ci məhəllə ünvanında aralarında yaranmış mübahisə zamanı atası, 1962-ci il təvəllüdlü Hakim Məmmədova və anası, 1965-ci il təvəllüdlü Zərifə Məmmədovaya bıçaqla xəsarətlər yetirərək onları qətlə yetirməkdə şübhəli bilinir.

Fikrət Məmmədov hadisədən sonra polis əməkdaşları tərəfindən saxlanılaraq istintaqa cəlb olunub. Ona qarşı Cinayət Məcəlləsinin bir neçə ağır maddəsi ilə ittiham irəli sürülüb.