Gəmilərimiz Afrika sularında belə saxlanılıb | "Caspian Marine Services" təcili məlumat yaydı

“Caspian Marine Services B.V.” şirkətinin Azərbaycandakı filialı gəmilərinin Eritreyanın ərazi sularında saxlanılmasına münasibət bildirib.

Filialdan “Report”a verilən açıqlamada bildirilib ki, “CMS Pəhləvan”, “CMS İgid” və “CMS-3” gəmiləri sahibkarlıq fəaliyyəti çərçivəsində Əbu-Dabi limanına yola düşüb və müəyyən edilən marşrut üzrə səfərin Süveyş kanalından keçməklə həyata keçirilməsi nəzərdə tutulub.

Gəmilərin riskli piratlıq qaynar nöqtələrdən keçməsi nəzərdə tutulduğu üçün təhlükəsizliyin təmin edilməsinə ehtiyac yaranıb. Bu məqsədlə gəmilərin mühafizəsini təmin etmək sahəsində ixtisaslaşan müvafiq şirkət ilə müqavilə bağlanılaraq hər bir gəmiyə 2 nəfər olmaqla hərbiləşdirilmiş mühafizə qrupları cəlb edilib.

Noyabrın 7-də gəmilər Eritreyanın dəniz sahil xəttindən keçərkən hava şəraiti səbəbindən bu ölkənin ərazi sularına girməklə hərəkəti davam etdirmək qərarı verilib. Gəmi kapitanları ərazi sularına daxil olmaqla bağlı məlumatın çatdırılması üçün Eritreyanın təhlükəsizlik və sahil mühafizəsi qurumları ilə VHF-16 beynəlxalq kanalı vasitəsilə əlaqə saxlamağa çalışsalar da cavab almaq mümkün olmayıb.

Həmin gün yerli vaxtla saat 10:06 radələrində gəmidən əldə edilən hesabata əsasən, hər üç gəminin 13°23'N, 042°39'E koordinatlarında Eritreya hərbi donanması xidməti tərəfindən saxlanıldığı məlum olub.

Eritreya hərbi donanması xidmətinin tələblərinə uyğun olaraq gəmilər hərəkət kursunu dəyişərək bu ölkənin hərbi donanmasının təyin etdiyi məntəqəyə gəlib və lövbərə dayandıqdan sonra hərbi donanmanın nümayəndələri tərəfindən yoxlama prosesinə cəlb edilib.

Qeyd edək ki, sözügedən gəmilərdə 18 Azərbaycan vətəndaşı və 6 əcnəbi vətəndaş olmaqla ümumilikdə 24 nəfər var. Şirkətdən bildirilib ki, qeyd olunan məsələ ilə əlaqədar kapitanlar tərəfindən məlumat daxil olan kimi elə həmin gün, 07.11.2024-cü il tarixində Dövlət Dəniz və Liman Agentliyinə rəsmi qaydada müraciət edilib. Daha sonra isə Xarici İşlər Nazirliyinə müvafiq qaydada müraciətlər olunub və məsələnin həlli ilə əlaqədar adıçəkilən qurumlar ilə sıx əməkdaşlıq çərçivəsində bütün işlər görülüb.

Eyni zamanda qeyd olunub ki, gəmilərin sığortalanmasını həyata keçirən şirkətin səlahiyyətli nümayəndələrinə və Böyük Britaniyanın müvafiq hüquq şirkətlərinə də müraciətlər edilib. Məsələnin həllinin tezləşdirilməsi üçün adıçəkilən təşkilatlar da əməkdaşlığa cəlb olunub.