Gəncədə kafeyə qumbara atıldı

Gəncədə iaşə obyektində qumbara partlayıb. Hadisə şəhərin Vəli Xuluflu küçəsində qeydə alınıb.

Belə ki, sözügedən ünvanda yerləşən kafeyə naməlum şəxs qumbara atıb. Hadisə vaxtı ölən və xəsarət alan olmayıb. İlkin məlumata görə, həmin ərazidə dava olub.

Hadisə yerinə polis əməkdaşları cəlb edilib. Ərazi mühafizəyə alınaraq ilkin araşdırmalara başlanılıb.

DİN-in Mətbuat Xidmətinin Gəncə regional qrupunun baş inspektoru polis kapitanı Eşqin Qasımov məsələ ilə bağlı Baku TV-yə açıqlama verib.

Bildirib ki, Gəncə Şəhər Baş Polis İdarəsinin və 2-ci Polis Şöbəsinin əməkdaşları hadisə yerinə cəlb olunub. Müvafiq araşdırmalar aparılır. Hazırda hadisəni törətməkdə şübhəli bilinən şəxs və ya şəxslərin müəyyən edilməsi istiqamətində zəruri əməliyyat-axtarış tədbirləri davam etdirilir.

Qeyd edək ki, faktla bağlı əlavə məlumat veriləcək.