Gəncədə qarlı havada təhlükə yaradan avtoxuliqanlar həbs edildi

Gəncədə avtoxuliqanlıq edərək ictimai asayişi pozan və bununla da vətəndaşların haqlı narazılığına səbəb olan sürücülər saxlanılıb.

Daxili İşlər Nazirliyi Mətbuat Xidmətinin Gəncə regional qrupundan verilən xəbərə görə, Akif Məmmədov və Fərəc Əmirov idarə etdikləri avtomobillə qarlı hava şəraitində yol hərəkəti qaydalarını kobud şəkildə pozaraq təhlükəli manevrlərlə avtoxuliqanlıq ediblər.

Onlar bunu videoya çəkərək sosial şəbəkələrdə də paylaşıblar. Həmin şəxslər barəsində protokol tərtib edilərək baxılması üçün məhkəməyə göndərilib. Akif Məmmədov və Fərəc Əmirov 15 sutkalıq inzibati qaydada həbs olunub.

Bundan başqa, keçirilən monitorinqlər zamanı “Niva” avtomobilinin sürücüsünün qanunla qadağan edilmiş səs siqnalından istifadə etməsi müəyyən olunub. Sürücü barəsində tərtib olunan protokol və səs siqnalı müsadirə edilməsi üçün məhkəməyə göndərilib.