Goranboyda dəhşətli yanğın | Xəsarətalan var

Goranboyda evdə yanğın olub, 6 aylıq azyaşlı oğlan uşağı yanıq xəsarətləri alıb.

Hadisə rayonun Veyisli qəsəbəsində, Rasim İsgəndərova məxsus mənzildə baş verib. Alovu tez bir zamanda ram etmək mümkün olub.

Ev sahibinin məlumatına görə, alovlanma zamanı xəsarət alan azyaşlı qonşunun kiçik övladıdır. Körpənin vəziyyətinin ağır olduğu bildirilir.

Kəlbəcər rayon sakinləri olan ev sahibləri Rasim İsgəndərov və oğlu hadisə vaxtı evdə olmayıblar, onlar doğma rayonlarından mal-qaranı qışlağa qaytarırmışlar. Elə yanğın xəbərini də yolda olanda alıblar.

Hadisə ilə bağlı Fövqəladə Hallar Nazirliyi də məlumat yayıb. Bildirilib ki, ümumi sahəsi 95 m² olan kürsülü, birmərtəbəli 2 otaqlı evin mətbəxinin yanar konstruksiyaları və içərisində olan ev əşyaları 20 m² sahədə yanıb.

Hadisənin baş vermə səbəbləri araşdırılır.