Goranboyda müharibə iştirakçısı olan şəxs dəhşətli qətl törətdi - Baku TV

Goranboy rayonunda 63 və 31 yaşlı 2 qadın bıçaqlanıb, onlardan biri dünyasını dəyişib.

Hadisə rayonun Faxralı kəndində baş verib.

Məlumata görə, hadisəni törətməkdə şübhəli bilinən şəxs 63 yaşlı qadının oğlu 39 yaşlı Emin Vəliyevdir.

O, ailə münaqişəsi zəminində anası Zoya Əhmədova və həyat yoldaşı Jalə Yolçuyevaya bıçaq xəsarətləri yetirib. 63 yaşlı qadın hadisə yerində dünyasını dəyişib, gəlini Jalə Yolçuyeva isə xəstəxanaya çatdırılıb.

Qeyd edək, əməli törətməkdə şübhəli bilinən Emin Vəliyev Vətən müharibəsi iştirakçısıdır.

Ailənin qohumu baş verənlərlə bağlı jurnalistlərə açıqlama verib.

“Hadisəni eşidəndən sonra bura gəldik. Gördük ki, əmim qızı həyatda deyil. Oğlu Vətən müharibəsində iştirak edib, o vaxtdan başı pozulmuşdu”, – o söyləyib.

Emin Vəliyev polis əməkdaşları tərəfindən saxlanılıb.

Faktla bağlı Goranboy Rayon Prokurorluğunda araşdırma aparılır.