Güclü külək Bakıda bir sıra fəsadlara səbəb oldu - Baku TV

Bakıda əsən güclü külək paytaxtın Sabunçu rayonu, Bakıxanov qəsəbəsində yerləşən "Bakıxanov Mall" ticarət mərkəzində fəsadlar törədib. Mərkəzin dam örtüyünün bir hissəsi qoparaq yolda hərəkətdə olan avtomobillərin üzərinə düşüb.

Hadisə ilə bağlı ticarət mərkəzinin nümayəndəsi İbrahim Bağırov Baku TV-yə açıqlama verib.

"Hava şəraiti ilə əlaqədar ticarət mərkəzimizin fasad və dam örtüyünə ziyan dəyib. Hadisə dərhal nəzarətə götürülüb, ticarət mərkəzinin, eləcə də Fövqəladə Hallar Nazirliyi (FHN) və Daxili İşlər Nazirliyinin (DİN) əməkdaşları operativ şəkildə əraziyə cəlb olunub. Hadisə zamanı xəsarətalan olmayıb. Yalnız 2-3 avtomobilə ziyan dəyib və həmin nəqliyyat vasitələrinin sahiblərinə dəymiş maddi zərər tərəfimizdən ödənilib", – deyə o bildirib.

Bakı Şəhər Yaşıllaşdırma Təsərrüfatı Birliyindən verilən məlumata görə, güclü küləklə əlaqədar qurumun qaynar xəttinə ümumilikdə 104 müraciət daxil olub. Güclü külək nəticəsində 41 ağac aşıb, 64 ağacın isə budaqları qırılıb:

"Aşan ağaclar və sınmış budaqlar ərazilərdən təmizlənib. Dəyişkən hava şəraiti ilə əlaqədar olaraq Bakı Şəhər Yaşıllaşdırma Təsərrüfatı Birliyinin əməkdaşları gücləndirilmiş iş rejimində fəaliyyətlərini davam etdirirlər".