Güclü külək Mingəçevirdə aləmi bir-birinə vurdu | Sakinlər hər şeyi danışdı

Mingəçevirdə güclü külək fəsadlar törədib.

Nəticədə şəhərin “Günəşli” yaşayış massivində sakinlərdən birinə məxsus dəmir hasar uçub, həmçinin ərazidəki elektrik dirəkləri, naqillər qırılıb.

“Buradakı ağaclar 1983-cü ildə əkilib. Onlar qırılıb ziyan verəndə ayılırıq. Əvvəldən bu halları düşünüb qarşısını almaq üçün tədbir görmək lazımdır”, – deyə şəhər sakini Hacıağa İsgəndərov söyləyib.

Mingəçevir Şəhər Mənzil-Kommunal Təsərrüfatı İstehsalat Birliyinin rəisi Şəhriyar Mustafayev bildirib ki, gecə saatlarından başlayan güclü külək nəticəsində şəhər təsərrüfatına ciddi ziyan dəyib:

“Şəhərin müxtəlif ərazilərində 61 ağac aşıb. Onlardan bəziləri küçə və prospektlərdə hərəkəti məhdudlaşdırmışdı. Həmin ağaclar yollardan götürülərək gediş-gəliş bərpa olunub. Şəhidlər xiyabanında da 26 ağac aşıb. Hazırda onların fəsadları aradan qaldırılır”.