Hərəsi bir söz deyir, hamı başından edir | Binəqədi sakinləri illərlə təhlükə altındadır

Baku TV-nin qaynar xəttinə Binəqədi rayonu, Biləcəri qəsəbəsi, Rəşid İsmayılov küçəsində ağacın aşması nəticəsində təhlükəli vəziyyətin yaranması ilə bağlı şikayət daxil olub.

Sakinlərin sözlərinə görə, bu, ilk dəfə baş vermir və artıq dəfələrlə təkrar olunub.

“Bir dəfə ağac aşanda alnımdan xəsarət aldım, hələ də izi qalıb. Dünən səhər elə bil ev silkələndi. Qonşudan soruşanda dedi ki, ağacın budağı aşıb. Burada körpə uşaq yaşayır, vəziyyət çox təhlükəlidir. Neçə dəfə şikayət etmişik, ölçü götürən olmayıb. Hərəsi bir söz deyir, hamı başından atır”, ‒ deyə sakinlərdən biri şikayətini dilə gətirib.

Məsələ ilə bağlı Bakı Şəhər Yaşıllaşdırma Təsərrüfatı Birliyindən bildirilib ki, sözügedən ünvanda ağacın ətrafı illər əvvəl qanunsuz tikililər tərəfindən zəbt edilib. Bu səbəbdən də ağaca xüsusi texnika vasitəsilə budama məqsədilə müdaxilə etmək mümkün olmayıb.

O da qeyd olunub ki, Birliyin mütəxəssisləri tərəfindən bir daha əraziyə baxış keçiriləcək və mümkün olduğu halda ağac budanacaq.