İrandan narkotik gətirib satmaq istədi

Şəmkir polisi İrandan gətirilən narkotik vasitənin ölkə ərazisində yayılmasına imkan verməyib.

Bu barədə Daxili İşlər Nazirliyinin Mətbuat Xidmətindən məlumat verilib. Bildirilib ki, Şəmkir Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində qeyri-qanuni yolla İrandan Şəmkir rayonu ərazisinə gətirilmiş narkotik vasitəni onlayn sifariş əsasında qəbul edərək ölkə ərazisində yayılmasını həyata keçirən şəxs saxlanılıb.

Məlum olub ki, Balakən rayon sakini Samir Əlibəyov Şəmkirə gələrək rayon ərazisində gizlədilən narkotik vasitəni 4000 manat pul və bir miqdar narkotik vasitə qarşılığında ölkənin digər şəhər və rayonlarına çatdırmağa razılaşıb.

Həmin şəxs saxlanılaraq polis şöbəsinə gətirilən zaman əlindəki qara rəngli çantadan 5 kq 50 qram heroin, 90 ədəd metadon həbi aşkar olunaraq götürülüb. Faktla bağlı araşdırmalar davam etdirilir.