İşçiləri aparan mikroavtobus dəhşətli qəzaya düşdü | "Eşitdik ki, aşıb, amma..." - Baku TV

Şəmkirdə ağır yol-nəqliyyat hadisəsi baş verib.

Hadisə dekabrın 4-də səhər saat 07:00 radələrində rayonun Kür qəsəbəsi yaxınlığında qeydə alınıb.

Yaxınlıqda yerləşən təsərrüfatlara işçi daşıyan mikroavtobusun yoldan çıxaraq dərəyə aşması nəticəsində avtobusda olan şəxslər müxtəlif dərəcəli xəsarətlər alıblar.

“Biz işə yollanırdıq, hadisə barədə eşidəndə kömək etməyə getdik. Sürücü bərk sürən deyil, sadəcə, gözü qaralıb”, – hadisə şahidi Elgün Məstanov söyləyib.

Əraziyə cəlb olunan təcili tibbi yardım briqadaları yaralıları Şəmkir Rayon Mərkəzi Xəstəxanasına çatdırıb. Hospitalizasiya olunan 12 nəfərdən 2-nin vəziyyəti ağırdır.

“Yol-nəqliyyat hadisəsi nəticəsində 11-i qadın və 1-i kişi olmaqla 12 nəfər Şəmkir Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. Onlara bədənin müxtəlif nahiyələrinin çoxsaylı travmaları diaqnozu qoyulub. Xəstələrin müalicəsi hazırda tibb müəssisəsində davam etdirilir”, – deyə həkim Teymur Hüseynli bildirib.

Faktla bağlı araşdırma aparılır.