İtkin düşən yeniyetmə tapıldı | Ana hər şeyi danışdı

Yanvarın 15-də axşam saatlarında 13 yaşlı Vüsal anasından icazəsiz evdən çıxaraq velosipedlə naməlum istiqamətə gedib və geri qayıtmayıb.

Övladını küçədə tapa bilməyən ana polisə müraciət edib.

“Birinci “102” qaynar xəttinə müraciət etdim, sonra məni Nəsimi Rayon 21-ci Polis Bölməsinə yönləndirdilər. Sumqayıtdan adının çəkilməsini istəməyən bir xanım mənə zəng etdi və övladımın yaşadıqları binanın həyətində olduğunu dedi. O an sanki dünyalar mənim oldu. Uşağım gecə çöldə qalıb, torpağın üstündə yatıb”, – yeniyetmənin anası Vüsalə Məmmədova söyləyib.

Daxili İşlər Nazirliyinin mətbuat xidmətindən bildirilib ki, anasının müraciətindən dərhal sonra axtarış elan edilib. Azyaşlının tapılması istiqamətində polis əməkdaşları tərəfindən tədbirlər görülüb və 13 yaşlı Vüsal Sumqayıtda tapılaraq valideynlərinə təhvil verilib.