Kliniki Tibbi Mərkəz xəstəni boğaza yığdı | Problem həll yolunu nə vaxt tapacaq?

Kliniki Tibbi Mərkəzdə travmatoloji əməliyyatlar dayandırılıb.

Bununla bağlı “Oxu.Az”a Aysel Həsənova adlı şəxs tərəfindən şikayət daxil olub.

O bildirib ki, valideyninin əməliyyatı günlərdir icra olunmur. Aprelin 4-də əməliyyat üçün xəstəxanaya müraciət etsələr də, sterilizasiya aparatlarının 4 gündür işləməməsi səbəbindən əməliyyatı icra etməyəcəklərini bildiriblər.

Şikayətçinin sözlərinə görə, anası günlərdir dözülməz ağrılardan əziyyət çəkir.

Problemlə bağlı Kliniki Tibbi Mərkəzdən bildirilib ki, avtoklav sterilizasiya aparatında yaranmış texniki nasazlığa görə bir sıra travmatoloji əməliyyatların icrasında müvəqqəti fasilə yaranıb:

“Sözügedən avtoklav aparatının təmiri prosesinə artıq başlanılıb, növbəti həftədən etibarən tam funksional vəziyyətə gətiriləcək və əməliyyatların icrasına başlanılacaq”.