Masazırda yaşayış kompleksində yanğın | FHN hadisə yerində

Abşeron rayonu, Masazır qəsəbəsində yerləşən “Qurtuluş-93” yaşayış kompleksində yanğın olub.

Bu barədə Fövqəladə Hallar Nazirliyindən məlumat verilib.

Əraziyə dərhal FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb edilib. Əməliyyat şəraitinə uyğun olaraq həyata keçirilmiş zəruri və təxirəsalınmaz tədbirlər sayəsində yanğın qısa müddətdə söndürülüb.

Nəticədə altımərtəbəli yaşayış binasının dördüncü mərtəbəsində ümumi sahəsi 60 kvadratmetr olan ikiotaqlı mənzilin bir otağının yanar konstruksiyaları 12 kvadratmetr sahədə yanıb. Təhlükəsizlik tədbirləri çərçivəsində beşi azyaşlı olmaqla 62 nəfər bina sakini təxliyə edilib. Mənzilin böyük hissəsi və digər mənzillər yanğından mühafizə olunub.