Məhkəmə zərərçəkmişlərin vəsatətlərini təmin etməyib - Baku TV

Yasamalda çoxmərtəbəli binada yanğın zamanı üç nəfərin ölümü ilə bağlı həbs edilən “Loft Dent” klinikasının direktoru Bəhruz Paşayevin cinayət işi üzrə məhkəməsi başlayıb.

Bakı Ağır Cinayətlər Məhkəməsinin hakimi Babək Pənahovun sədrliyi ilə keçirilən hazırlıq iclasında təqsirləndirilən şəxsin və zərərçəkənlərin anket məlumatları dəqiqləşdirilib.

Prosesdə prokuror məhkəməyə təqsirləndirilən şəxs barədə seçilən həbs qətimkan tədbirinin dəyişdirilmədən saxlanılmasını və işin baxışa verilməsini təklif edib. Daha sonra vəkillər vəsatət verərək işin ibtidai istintaqa qaytarılmasını və yanğın baş verən klinikanın sahibi Vüqar Abbasovun təqsirləndirilən şəxs qismində cəlb olunmasını istəyiblər.

Yanğında azyaşlı övladını itirən vəkil Əli Qəmbərov və digər zərərçəkənlər də analoji vəsatətlə çıxış ediblər.

Məhkəmə müşavirədən qayıtdıqdan sonra vəsatətləri təmin etməyib. Eyni zamanda işin baxışa verilməsi və təqsirləndirilən şəxs barəsində seçilən həbs qətimkan tədbirinin dəyişdirilmədən saxlanılması ilə bağlı qərar qəbul edib.

Məhkəmənin növbəti iclası iyunun 30-na təyin edilib.