Məktəbdə zəhərlənmə hadisəsi baş verib

Şəkidə şagirdlər və müəllimlər zəhərləniblər.

Hadisə rayonun Qudula kənd tam orta məktəbində baş verib. Dərs zamanı məktəbin 24 şagirdi və 3 müəllimi özlərini halsız hiss ediblər.

Zəhərlənən şəxslər Şəki Rayon Mərkəzi Xəstəxanasına çatdırılıb. Şagird və müəllimlərə ilkin tibbi yardım göstərilib. İlkin araşdırmalara görə, zəhərlənməyə məktəbdə mayın 19-da aparılan dezinfeksiya işi səbəb olub.

Valideynlər zəhərlənmə yaxud allergik əlamətlərin bir gün sonra baş verməsini heç cür anlaya bilmirlər.

Daxili İşlər Nazirliyinin Mətbuat Xidmətinin Şəki regional qrupundan verilən məlumata görə, qeyd olunan faktla bağlı araşdırmalara başlanılıb və hadisənin başvermə səbəbləri aparılan araşdırmalardan sonra məlum olacaq.

TƏBİB də hadisə barədə məlumat yayıb. Bildirilib ki, hazırda tibb müəssisəsinin Təcili Tibbi Yardım şöbəsində 4 nəfərə zəruri tibbi xidmətlər göstərilir. Vəziyyətləri qənaətbəxş olan 23 nəfər isə tibbi xidmət aldıqdan sonra ambulator müalicə üçün evə buraxılıb.