Məsciddən oğurluq edən Gəncə sakini həbs edildi

Nəsimi rayonu, Dilarə Əliyeva 155 ünvanında yerləşən Kərbəlayı Abdullah məscidində 20 000 manat məbləğində pul oğurlanıb.

Məlum hadisə zamanı məscidin pəncərələrində dəmir barmaqlıq olmayıb. Gecə radələrində bunu fürsət bilən oğru pəncərədən içəri daxil olub. Axundun dəmir seyfinin kilidini isə bıçaq vasitəsilə açıb.

39 yaşlı Gəncə sakini oğurluq etməzdən öncə maddi imkanının yaxşı olmadığını bildirərək məscidin imamı Ağasəlim Səlimovdan pul istəyib. İmam isə seyfdən pul götürərək ona 10 manat verib. Elə bu zaman təqsirləndirilən şəxs seyfdə pul olduğunu bilib və oğurluq etmək qərarına gəlib. Ağasəlim Səlimova məxsus 17 800 manat, 525 ABŞ dolları və 700 avro olmaqla ümumilikdə 20 000 manat pul oğurlayıb. Həmin vəsaitin bir hissəsini gecə klubunda əyləncəyə xərcləyib. Bir neçə gün sonra isə həbs edilib.

Məhkəmənin hökmü ilə Cinayət Məcəlləsinin müvafiq maddələrinə əsasən, Gəncə sakini cinayət əməlini törətməkdə təqsirli bilinərək iki il altı ay azadlıqdan məhrum edilib.

Qeyd edək ki, hadisə 2023-cü ilin sentyabrında baş verib.