Mingəçevir məktəbində dəhşətli hadisə | Həkimdən açıqlama

Mingəçevirdə yeniyetmə oxuduğu məktəbdə yıxılaraq xəsarət alıb.

Hadisə 8 saylı Nizami Gəncəvi adına tam orta məktəbdə qeydə alınıb.

Sosial şəbəkələrdə yayılan məlumatlarda 17 yaşlı Əli Abbaslının təhsil ocağının 2-ci mərtəbəsindən yıxıldığı iddia edilsə də, şagirdin həmin məktəbdə çalışan anası deyilənləri təkzib edib.

Uşaq İntensiv Terapiya Şöbəsinin bölmə müdiri Fidan Qurbanova bildirib ki, yeniyetmənin anasının verdiyi məlumata görə, övladı yanında yıxılıb:

“Bu zaman baş və boyunun arxa hissəsi zədə alıb. Yıxılanda əli yerə dəyib, şüşə kəsib. Müayinə otağında uşaqda qıcolma başlayıb. Zərbə ilə bağlı beyin silkələnməsi olduğunu düşünürük. Yəqin ki, qıcolmalar da bu səbəbdən baş verib”.

Daxili İşlər Nazirliyinin Mətbuat Xidmətinin Şəki regional qrupundan isə bildirilib ki, yeniyetmənin yıxılaraq xəsarət alması barədə polisə məlumat daxil olub. Faktla bağlı araşdırma aparılır.