Mingəçevirdə güclü külək | Ölən və xəsarətalanlar var

Mingəçevirdə güclü külək fəsadlara səbəb olub.

Külək şəhərin müxtəlif küçə və prospektlərində irigövdəli ağacları aşırıb.

Yolda hərəkətdə olan avtomobillərin və piyadaların üzərinə ağac parçaları düşüb. Beşmərtəbəli binanın dam örtüyü qopub. Həmin ərazidə yüksəkgərginlikli elektrik xətləri qırılaraq sakinlərə məxsus həyət evlərinin üzərinə düşüb.

Şəhərin müxtəlif ərazilərində irigövdəli ağaclar avtomobillərin üzərinə düşərək sakinlərə ziyan vurub. 5 şəhər sakini müxtəlif bədən xəsarətləri alaraq xəstəxanaya yerləşdirilib. Onlara zəruri tibbi xidmətlər göstərilib. Vəziyyətləri qənaətbəxş olan 3 uşaq ambulator müalicə üçün evə buraxılıb. Digər 2 nəfərin müayinə və müalicələri davam etdirilir.

Qeyd edək ki, güclü külək zamanı Mingəçevirdə üzərinə ağac parçası düşən 21 yaşlı Rəvan Qasımzadə həyatını itirib.