Müəllim etiraf etdi ki, mən vurmuşam uşağı... | Bağçada döyülən uşağın atası hər şeyi danışdı

Sosial şəbəkələrdə Lənkəran şəhərində “Kaspi Kids” uşaq bağçasında azyaşlılara qarşı şiddət göstərilməsi ilə bağlı videogörüntülər geniş müzakirələrə səbəb olub.

Paylaşımda müəllimin uşağın başına vurduğu, nəticədə, balacanın başının qanadığı qeyd olunub.

Uşağın atası bildirib ki, hadisə barədə ona günorta saatlarında xəbər verilib:

“Mən işdə idim. Evdən zəng edib dedilər ki, uşaq başından xəsarət alıb. Kursa getdim, videogörüntülərlə tanış oldum. Müəllim özü etiraf etdi ki, uşağı o vurub. Kadrlarda da görünür ki, müəllim bilərəkdən iki dəfə suqabı ilə övladımın başına zərbə endirib. Vurduqdan sonra isə kömək etməyib. Uşaq iki saata yaxın ağlayıb və köməksiz vəziyyətdə qalıb”.

Azyaşlının nənəsi isə bildirib ki, nəvəsi əvvəllər də müəllimin onu döydüyünü deyib, lakin onlar buna inanmayıblar:

“Dəfələrlə evə gəlib deyirdi ki, məni Arzu müəllimə döyüb. Biz inanmırdıq. Elə vurmuşdu ki, nəvəm yemək belə yeyə bilmirdi”.