Lənkəranda faciəvi qəza | Mikroavtobus yük avtomobili ilə toqquşdu - Baku TV

Lənkəranda “Mercedes Vito” markalı mikroavtobusla yük avtomobili toqquşub, iki nəfər həyatını itirib.

Hadisə sentyabrın 16-da axşam saatlarında yeni Ələt-Astara magistralında, yolun 155-ci kilometrliyində qeydə alınıb.

Astara istiqamətində hərəkətdə olan Lənkəran rayonunun Şıxakəran kənd sakini, 42 yaşlı Amid Məmmədovun idarə etdiyi mikroavtobus İranın Astara şəhər sakini Aydın Riyazinin idarə etdiyi yük avtomobili ilə toqquşub.

Qəza nəticəsində mikroavtobusda sərnişin qismində olan iki nəfər Şıxakəran kənd sakini, 64 yaşlı Gülnaz Ağayeva və Aşağı Nüvədi kənd sakini olan başqa bir şəxs hadisə yerində həyatını itirib.

48 yaşlı Gülnarə Hüseynova müxtəlif dərəcəli bədən xəsarətləri alaraq Lənkəran Rayon Mərkəzi Xəstəxanasına aparılıb. Vəziyyəti ağır qiymətləndirilən yaralı Reanimasiya şöbəsinə yerləşdirilib.

Yük avtomobilinin sürücüsü qəzanın necə baş verdiyini belə izah edib: “Hərəkətdə olanda maşınımdan səs gəldi. Dönmə işığını yandırdım ki, yavaş-yavaş maşını kənara çəkib saxlayım. Anidən mikroavtobus tormozsuz gəlib maşının altına girdi”.

Faktla bağlı araşdırma aparılır.