"2-ni də divara qısnayıb..." | Gürcüstanda azərbaycanlı qardaşlar öldürüldü - Baku TV

Gürcüstanda toy məclisinə gedən üç qardaş silahlı hücuma məruz qalıb.

Hadisə şahidlərinin sözlərinə görə, qardaşlar və onların sinif yoldaşı toy mərasiminə gedərkən yolda qonşuları tərəfindən avtomat silahla atəşə tutulublar. Hücum nəticəsində iki qardaş hadisə yerində həyatını itirib, üçüncü qardaş isə qaçaraq xilas olub.

Hadisədən sağ çıxan qardaş hücum anını belə xatırlayır:

“Üç qardaş və bir sinif yoldaşım toya gedirdik. Yolda qəfildən bir avtomobil qarşımızı kəsdi. Sürücü maşından avtomatla düşüb bizə atəş açdı. Əvvəl böyük qardaşıma vurdu. Sonra mənə tərəf yönəldi, amma məni vura bilmədi. Digər qardaşımın arxasınca düşüb ona da atəş açdı, sonra yenidən böyük qardaşımın yanına qayıtdı. O, bizim qonşumuzdur. Aramızda heç bir ədavət olmayıb”.

Qardaşlarla birlikdə toya gedən kənd sakinləri də dəhşətli anların şahidi olublar. Onlardan biri hücum edən şəxsin əlində avtomat silah gördükdən sonra təşvişə düşərək hadisə yerindən uzaqlaşmağa çalışdığını bildirib:

“Avtomatla maşından düşüb atəş açmağa başladı. Mən də üzümü tutub ora-bura qaçdım. Dedim ki, vurursa, kürəyimdən vursun, təki gözüm görməsin. Qaçarkən yaxınlıqdakı evin qapısının açıq olduğunu görüb içəri girdim və xilas oldum”.

Qeyd edək ki, faktla bağlı cinayət işi başlanılıb. Hadisəni törədən şəxs hüquq-mühafizə orqanlarının əməkdaşları tərəfindən qısa müddətdə saxlanılıb.

Gürcüstan Daxili İşlər Nazirliyinin məlumatına görə, hadisəyə səbəb tərəflər arasında əvvəllər mövcud olmuş münaqişə olub.