Narkokuryerlərin “hava hücumu” | PUA ilə ölkəyə narkotik daşıyanlar belə tutuldu

“Lənkəran” sərhəd dəstəsinin xidməti ərazisində pilotsuz uçuş aparatının hərəkəti və əraziyə kiçik həcmli bağlama ataraq İran istiqamətində geri qayıtması müşahidə edilib.

Bu barədə Dövlət Sərhəd Xidmətindən məlumat verilib.

Bildirilib ki, keçirilən sərhəd axtarışı və əməliyyat tədbirləri nəticəsində atılmış bağlamanı götürmək məqsədilə əraziyə gələn Lənkəran rayon sakini, 1988-ci il təvəllüdlü Anar Həsənov, eləcə də avtomobildə onu gözləyən Qubadlı rayon sakini, 1985-ci il təvəllüdlü Razim Hüseynov şübhəli şəxs qismində saxlanılıb.

Onlar ilkin dindirilmə zamanı əraziyə PUA vasitəsilə atılmış 4 kiloqram 504 qram narkotik vasitə marixuananı götürmək məqsədilə gəldiklərini etiraf ediblər.

Araşdırma nəticəsində onların əvvəllər də məhkum olduqları müəyyənləşib. Fakt üzrə əməliyyat-istintaq tədbirləri davam etdirilir.