Narkotikləri dənizə atıb qaçmaq istədilər | DSX və DTX-dən birgə əməliyyat

Dövlət Sərhəd Xidməti və Dövlət Təhlükəsizliyi Xidmətinin birgə əməliyyatı nəticəsində Xəzər dənizindən dövlət sərhədini pozmaqla ölkə ərazisinə külli miqdarda narkotik vasitə keçirməyə cəhd göstərən mütəşəkkil qaçaqmalçı qrupun üzvləri saxlanılıb.

Bu barədə Dövlət Sərhəd Xidmətinin Mətbuat Xidməti məlumat yayıb.

İyunun 25-i saat 00:17-də Sahil Mühafizəsinin Nəzarət Mərkəzi Xəzərin Şorabad qəsəbəsi istiqamətində sürətlə hərəkət edən 2 ədəd naməlum üzmə vasitəsi müşahidə edib. Onların saxlanılması istiqamətində operativ əməliyyat tədbirlərinə başlanılıb.

Sərhəd pozucuları sərhədçilərin qanuni tələblərinə tabesizlik göstərməklə yanaşı, dənizdə hərəkətdə olarkən naməlum əşyanı suya atıblar. Onlara qarşı qanunun tələblərinə uyğun olaraq silah tətbiq edilib.

Nəticədə layner tipli itisürətli üzmə vasitələrindən biri 2 heyət üzvü ilə birlikdə saxlanılıb. İkinci üzmə vasitəsinin isə heyət üzvlərindən biri saxlanılsa da, digəri itkin düşüb. Gəmi heyəti yaralı sərhəd pozucularına ilkin tibbi yardım göstərdikdən sonra onlar ixtisaslaşmış tibb müəssisəsinə təxliyə ediliblər.

Araşdırma zamanı saxlanılan şəxslərin İran vətəndaşları – Gülüstan əyalətinin Bender-Türkmən şəhər sakinləri – 1984-cü il təvəllüdlü Behman Qasim və Rəhim Ounek Anna, 1983-cü il təvəllüdlü Nuri Nurməmməd Bəhrəmxalid olduqları, onların dövlət sərhədini narkotik vasitələri qeyri-qanuni yolla ölkə ərazisinə keçirmək məqsədi ilə pozduqları müəyyən edilib.

Əməliyyat tədbirləri nəticəsində İran mütəşəkkil qaçaqmalçı qrupunu qarşılamaq niyyəti ilə həmin əraziyə, dənizin sahilinə gəlmiş Azərbaycan vətəndaşları 1982-ci il təvəllüdlü Elxan Nadir oğlu Əliyev və 1976-cı il təvəllüdlü Esmira Məmmədova saxlanılıb.

Hazırda Dövlət Sərhəd Xidmətinin gözətçi gəmiləri və dalğıclar tərəfindən digər itkin düşmüş sərhəd pozucusu İran vətəndaşı 1985-ci il təvəllüdlü Həmid Vəkilinin və dənizə atılmış maddi sübutların axtarışı həyata keçirilir.

Fakt üzrə Baş Prokurorluqla birgə əməliyyаt-istintaq və axtarış tədbirləri dаvаm еtdirilir.