Neftçalada bayram sevinci kədərə çevrilən ailə faciəsi - Baku TV

Neftçala rayonunun Qazaxbərəsi kəndində bayram hazırlıqları faciə ilə yekunlaşıb. Bayram süfrəsi üçün alış-veriş etmək istəyən iki yeniyetmə qardaş – Rəvan və Əli Manaflılar avtomobil qəzası nəticəsində həyatlarını itiriblər.

Mağazadan geri qayıdarkən qardaşlardan birinin sükanı arxasında olduğu avtomobil idarəetmənin itirilməsi nəticəsində evlərinə cəmi 20 metr qalmış yol kənarındakı kanala aşıb. Zərbənin təsirindən qaz borusu qırılıb və avtomobil suya düşüb. Hər iki qardaş hadisə yerində dünyasını dəyişib. Onların cansız bədənləri sudan çıxarılaraq ailələrinə təhvil verilib.

Qonşuların sözlərinə görə, həmin ərazi illərdir təhlükə mənbəyi olub. Bu dəfə də sözügedən yerdə iki gəncin ömrü yarımçıq qaldı. Yeniyetmələrin valideynləri Bakı şəhərində yaşayır, ailə bayram münasibətilə kəndə toplaşmışdı. Qardaşlardan biri son bir ildə babasının yanında qalırmış.

Qeyd edək ki, ailədə elə iki övlad olub. Həlak olan yeniyetmələr kənd qəbiristanlığında yanaşı məzarlarda torpağa tapşırılıb. Hadisə ilə bağlı araşdırmalar davam edir.