Ölkədən qaçmaq istəyən Çin vətəndaşları saxlanıldı | Abşeronda əməliyyat

Abşeron rayonu, Saray qəsəbəsindəki fərdi yaşayış evlərindən birindən içərisində 130 000 ABŞ dolları və 700 qram qızıl-zinət əşyaları olan seyf oğurlanıb.

Hadisə ilə bağlı polisin keçirdiyi əməliyyat tədbirləri ilə oğurluğu törətməkdə şübhəli bilinən Çin vətəndaşları – V.Zhijian və V.Hongfu ölkədən çıxmağa cəhd edərkən müəyyən olunaraq saxlanılıblar. Onların üzərindən 17 306 dollar, 9586 BƏƏ dirhəmi, müxtəlif xarici valyutalarda olan əsginaslar və 147 qram qızıl-zinət əşyaları aşkar edilərək götürülüb.

Oğurlanan pul və zinət əşyalarının yerinin müəyyən edilməsi istiqamətində tədbirlər görülür.

Faktla bağlı Abşeron Rayon Polis İdarəsində Cinayət Məcəlləsinin müvafiq maddəsi ilə cinayət işi başlanılıb, şübhəli şəxslər barəsində həbs qətimkan tədbiri seçilib.

Hazırda iş üzrə zəruri əməliyyat-istintaq tədbirləri davam etdirilir.