Paytaxda mağazalara qənim kəsilənlər ələ keçdi

Paytaxt sakinlərinin, onlara məxsus avtomobilin və müxtəlif mağazalardan qiymətli əşyalarla yanaşı, bir çox məhsulların da oğurlanması ilə bağlı polisə şikayətindən sonra Sabunçu Rayon Polis İdarəsi 14-cü Polis Şöbəsi əməkdaşları əməliyyat keçirib.

Tədbirlər zamanı oğurluqda şübhəli bilinən əvvəllər dəfələrlə məhkum olunanlar – 39 yaşlı Ramal Cəfərov və qardaşı 38 yaşlı Sakit Cəfərov saxlanılıb.

Onlar əvvəlcə rayon ərazisində vətəndaşlardan birinə məxsus “VAZ-2107” markalı avtomobili qaçırmaq istəsələr də, qardaşların bu cəhdi baş tutmayıb. Bundan sonra digər bir vətəndaşa məxsus “VAZ-2106” markalı avtomobili qaçıraraq həmin avtomobillə ətraf ərazilərdəki mağaza və telefon dükanlarını talayıblar. Ümumi dəyəri 10 min manata yaxın olan nağd pul, lotereya biletləri, tütün məmulatları və müxtəlif markalı 20-dən çox mobil telefon oğurlayıblar.

Bu şəxslər qaçırdıqları avtomobillə Ramana qəsəbəsi ərazisində qəza törətdikdən sonra nəqliyyat vasitəsini hadisə yerində qoyaraq oradan uzaqlaşıblar.

Ramal Cəfərov və qardaşı Sakit Cəfərovun talama cinayətləri təhlükəsizlik kameraları vasitəsilə lentə alınıb.

Qeyd edəki, qardaşlardan biri – Ramal Cəfərovun Lənkərandakı yanacaqdoldurma məntəqələrindən birindən oğurluq etdiyi üçün axtarışda olduğu da müəyyən olunub.

Faktlarla bağlı Cinayət Məcəlləsinin müvafiq maddələri ilə cinayət işi başlanılıb.

Saxlanılan şəxslərin analoji cinayətlərdə iştirakının olub-olmamasının müəyyən edilməsi istiqamətində araşdırmalar davam etdirilir.