Qəbiristanlıqdakı davanın sonu qətllə bitdi | Tükürpərdici hadisənin detalları

Qardaşını oraqla öldürən şəxsə hökm oxunub.

2022-ci il sentyabrın 7-də paytaxtın Bakıxanov qəsəbəsində yerləşən qəbiristanlıqda qətl hadisəsi baş verib.

Şəhriyar Allahverdiyev adlı şəxs Daxili İşlər Nazirliyinin “102” xidmətinə zəng edərək qohumu Səyyad İsmayılovun bıçaqlanması barədə məlumat verib. Hadisə yerinə baxış zamanı ərazidə bir ədəd oraq və bıçaq aşkar edilib. Cinayəti mərhumun doğma qardaşı 56 yaşlı Siyavuş İsmayılovun törətdiyi müəyyən olunub və o, həmin gün saxlanılıb.

Faktla bağlı qəsdən adam öldürmə maddəsi ilə cinayət işi başlanılıb.

İstintaqla müəyyən olunub ki, dəfn mərasimində iştirak edən Siyavuş və Səyyad İsmayılovlar arasında əvvəldən mövcud olan münaqişə mübahisəyə səbəb olub. Səyyadın təhqiramiz ifadələr işlədərək bıçaqla Siyavuşa hücum etdiyi, Siyavuşun isə müqavimət göstərərək bıçağı əlindən aldığı, lakin Səyyadın kürəklə yenidən hücum etməsi nəticəsində Siyavuşun oraqla ona zərbələr endirdiyi bildirilib.

Hadisə şahidləri də qardaşlar arasında mübahisənin olduğunu təsdiqləyiblər.

Siyavuş İsmayılov məhkəmədə özünü qismən təqsirli bilib və bu addımı özünü müdafiə etmək üçün attığını vurğulayıb.

Bakı Ağır Cinayətlər Məhkəməsi Siyavuş İsmayılovu 10 il müddətinə azadlıqdan məhrum edib və cəzasının ciddi rejimli cəzaçəkmə müəssisəsində çəkilməsinə qərar verib.