QHT vəzifəliləri cinayət məsuliyyətinə cəlb edildi

Qanunsuz olaraq orden və medallar hazırlayaraq pul qarşılığında və ya şəxsi münasibətlərə görə çoxsaylı şəxslərə təqdim edən bir qrup qeyri-hökumət təşkilatının (QHT) vəzifəli şəxsləri cinayət məsuliyyətinə cəlb edilib. Baş Prokurorluğun məlumatına görə, Baş prokuror yanında Korrupsiyaya qarşı Mübarizə Baş İdarəsində aparılan istintaq zamanı bu şəxslərin vəzifə səlahiyyətlərini aşmasına dair əsaslı şübhələr müəyyən edilib. İttiham olunanlar arasında “Beynəlmiləlçi Əlil Döyüşçülər” Fondunun sədri Səyyaf Orucov, “Azərbaycan Qarabağ Müharibəsi Əlilləri, Veteranları və Şəhid Ailələri” İB-nin sədri Mehdi Mehdiyev və “Azərbaycan Vətən Müharibəsi Veteranları” İB-nin sədri Füzuli Rzaquliyev də var. Axtarış zamanı 1500-dən çox orden-medal və 8000-dən çox şəxsə təqdim edilməsinə dair qeydlər aşkarlanıb. Hər üç şəxsə Cinayət Məcəlləsinin 309.1-ci (vəzifə səlahiyyətlərini aşma) maddəsi ilə ittiham elan edilib.