Qisas üçün qonaq kimi çağırdı, sonra... | Ağstafadakı dəhşətli hadisənin detalları

Ağstafada iki gəncin mübahisəsi cinayətlə yekunlaşıb. Məlumata görə, rayon sakinləri Alim Məmmədov və Turan Nəsibli arasında şəxsi münasibətlər zəminində mübahisə yaranıb.

İddialara görə, Alim Məmmədov bir neçə dostu ilə birgə Turan Nəsiblini çay kənarına apararaq onu döyüb, telefona çəkərək üzr istədib və görüntüləri müəyyən şəxslər arasında yayıb. Bundan sonra T.Nəsiblinin atası 53 yaşlı Şəmkir Nəsibov A.Məmmədovu evinə qonaq dəvət edib, daha sonra bir neçə şəxslə onun əllərini bağlayaraq döyüb, kəsici-deşici alətlərlə xəsarətlər yetirib.

Ağstafa Rayon Mərkəzi Xəstəxanasının həkimi Teyyub Carçıyev bildirib ki, 3 yanvar 2025-ci il tarixində gecə saat 02:50 radələrində zərərçəkmiş kişi cinsli şəxs başın çoxsaylı deşilmiş yarası, sağ gözün hematoması, kürək nahiyəsinin cırılmış yarası, qançırları ilə adıçəkilən xəstəxananın Təcili və Təxirəsalınmaz Tibbi Yardım şöbəsinə hospitalizasiya olunub və xəstəyə lazımi tədbirlər göstərilib:

"O, 6 yanvar 2025-ci il tarixində xəstəxanadan buraxılıb".

Məsələ ilə bağlı Daxili İşlər Nazirliyindən bildirilib ki, cinayət əməlini törətməkdə şübhəli bilinən 53 yaşlı Şəmkir Nəsibov və onun oğlu 19 yaşlı Turan Nəsibli saxlanılaraq məsuliyyətə cəlb ediliblər. Fakta görə, Cinayət Məcəlləsinin müvafiq maddələri ilə cinayət işi başlanılmaqla həmin şəxslərə ittiham elan olunub və barələrində həbs qətimkan tədbiri seçilib.

Qeyd edək ki, hüquq-mühafizə orqanları tərəfindən görüntülərdə əks olunan və ümumilikdə cinayət hadisəsində birbaşa və ya bilavasitə iştirakının olduğu şübhəli bilinən şəxslərin də məsuliyyətə cəlb olunması istiqamətində tədbirlər davam etdirilir.