Qızını qətlə yetirmək istəyən ata hakim qarşısında | Hökm oxundu

Bakıda qızını öldürməyə cəhddə təqsirləndirilən Rəfail Cavadovun cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Səbuhi Hüseynovun sədrliyi ilə keçirilən son prosesdə təqsirləndirilənə hökm oxunub. Rəfail Cavadov 11 il 3 ay müddətinə azadlıqdan məhrum edilib.

Dövlət ittihamçısı Orxan Kəngərli də ittiham nitqi ilə çıxış edərkən Rəfail Cavadovun 11 il 3 ay müddətinə azadlıqdan məhrum edilməsini məhkəməyə təklif etmişdi.

Qeyd edək ki, hadisə 2024-cü ilin fevralında paytaxtın Qaradağ rayonu ərazisində baş verib. Belə ki, 1958-ci il təvəllüdlü Rəfail Cavadov qısqanclıq zəminində qızı Rəna Cavadovaya 5 bıçaq zərbəsi ilə xəsarət yetirib. İttihamda hadisəyə Rəfail Cavadovun qızının mobil telefonunda qeyri-etik fotoşəkilləri görməsinin səbəb olduğu bildirilir. Rəfail Cavadov hüquq-mühafizə orqanlarının əməkdaşları tərəfindən şübhəli şəxs qismində saxlanılıb. Ona qarşı Cinayət Məcəlləsinin xüsusi amansızlıqla qəsdən adam öldürməyə cəhd maddəsi ilə ittiham irəli sürülüb.