Qubada ağır faciə | 5 aylıq hamilə olan qadın nəyin qurbanı oldu? - Baku TV

İyulun 15-də gecə saat 1 radələrində bir qadın aqonal vəziyyətdə Quba Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Bu barədə TƏBİB məlumat yayıb.

Bildirilir ki, 23 yaşlı hamiləyə anafilaktik şok, dördüncü dərəcəli anafilaktik şok, ölü döl diaqnozları təyin olunub və zəruri tibbi yardım göstərilib.

Pasiyent qəbul zamanı aqonal vəziyyətdə olub, ürək fəaliyyəti və ritmi qeydə alınmayıb. Ürəyin qapalı masajı və digər zəruri reanimasiya tədbirləri həyata keçirilib. Pasiyentin həyat fəaliyyəti bərpa edilib. Daha sonra tibbi göstəriş əsasında pasiyent üzərində cərrahi əməliyyat icra olunaraq ölü döl xaric edilib.

Xəstənin müalicəsi Reanimasiya və İntensiv terapiya şöbəsində davam etdirilib. Lakin pasiyent aparılan reanimasiya tədbirlərinə cavab verməyib və 15 iyul tarixində saat 17:10 radələrində onun bioloji ölüm faktı qeydə alınıb.

Meyit təşrih olunması üçün Məhkəmə-Tibbi Ekspertiza və Patoloji Anatomiya Birliyinin Quba Rayon Şöbəsinə təhvil verilib.

Qeyd edək ki, faktla bağlı araşdırma aparılır.