Qubada ailə faciəsi | Tək övladını itirən gözdən əlil ana fəryad etdi - Baku TV

Quba rayonunda yeniyetmənin su kanalında batdığı ehtimal edilir.

Hadisə Samur–Abşeron kanalının rayonun Vəlvələ kəndi ərazisindən keçən hissəsində qeydə alınıb.

İlkin məlumata görə, Paşaoba kənd sakini, 16 yaşlı Fərid Osmanov su kanalına düşüb. Hazırda onun axtarışları davam etdirilir.

Yeniyetmənin nənəsi bildirib ki, Fərid görmə məhdudiyyətli anasının yeganə övladıdır:

“Anası 16 ildir oğlunun üzünü görə bilmir, gözdən əlildir. Qızımın tək övladıdır. Elə bu uşağın üstündə balamın gözləri tutulub. Atasına deyir ki, uşağımın meyitini gətirin, əlimi sürtüm”.

Yeniyetmənin xalası isə hadisənin təxminən saat 16:00 radələrində baş verdiyini deyib:

“Bacımın oğlu kanala üzməyə gedərkən suya düşüb. Yanındakı uşaqlar onu xilas edə bilməyiblər, özləri də suya atılmağa qorxublar. Təxminən 10 dəqiqə suda qalaraq kanaldakı dəmirdən yapışıb. Yanındakılar azyaşlı olduqları üçün onu çıxarmağa gücləri çatmayıb. Həmin ərazidə köməyə gələcək heç kim olmayıb. Nənəsi onu böyük əziyyətlə böyüdüb. Aidiyyəti qurumlardan xahiş edirik ki, kanalın suyunu dayandırsınlar və Fəridimizin nəşini taparaq bizə təhvil versinlər”.