Qubalıları aldadıb 30 min manat mənimsəyən dələduz saxlanıldı
Qubada vətəndaşların etibarından sui-istifadə edərək onlara otuz min manatdan artıq ziyan vuran şəxs saxlanılıb.
Daxili İşlər Nazirliyinin Mətbuat Xidmətinin Quba regional qrupundan verilən məlumata görə, daxil olan məlumat əsasında keçirilən əməliyyat-axtarış tədbirləri zamanı müvəqqəti olaraq Qubada yaşayan Cəfər Məmmədov saxlanılıb. O, 25-dən artıq şəxsə problemlərinin həllinə dair səlahiyyəti olmadığı halda vədlər verərək onlara külli miqdarda ziyan vurub.
Belə ki o, özgənin əmlakını talama məqsədilə etibardan sui-istifadə etmə və aldatma yolu ilə uzun müddət ərzində ayrı-ayrı şəxslərə guya köməklik göstərəcəyi adı altında ümumilikdə 30 980 manat vəsaiti ələ keçirib.
Həmin şəxs ifadəsində etdiyi dələduzluq əməllərini etiraf edib. O həmçinin bir neçə xanıma onlarla evlənəcəyinə dair vədlər verib. Həmin şəxslərin və onların ailə üzvlərinin adına bankdan kredit götürərək dələduzluq edib.
Faktla bağlı cinayət işi başlanılıb və məhkəmənin qərarı ilə Cəfər Məmmədovun barəsində həbs qətimkan tədbiri seçilib.