"Ay bala, onu niyə öldürdün?" | Bir anlıq hirs qandonduran ailə faciəsinə səbəb oldu?

Neftçalanın Qaralı kəndində azyaşlının ölümü ilə nəticələnən faciəvi hadisə baş verib.

Məlumata görə, kənd sakini, 24 yaşlı Şəbnəm Allahverdiyevanın qucağında olan əkiz körpələrdən biri yerə düşüb. Nəticədə müxtəlif dərəcəli bədən xəsarətləri alan 1 yaşlı uşaq həyatını itirib.

Körpənin atası Səttar Allahverdiyev bildirib ki, həyat yoldaşı ona zəng edərək uşağın vəziyyətinin yaxşı olmadığını deyib:

“Şəbnəm mənə zəng edib dedi ki, uşağın vəziyyəti yaxşı deyil, özünü çatdır. Söylədi ki, uşaq ağlayırdı, sakitləşmirdi, səbrim çatmadı, qucağıma alıb silkələdim. Birdən hirs gəldi, yerə çırpdım”.

Qohumlarının sözlərinə görə, Şəbnəm Allahverdiyeva uşaqlar dünyaya gəldikdən sonra psixoloji çətinliklərlə üzləşib. Onlar bildiriblər ki, qadının uşaqları döydüyünü görməsələr də, doğuşdan sonra əsəb və gərginlik yaşayırdı.

Qeyd edək ki, Şəbnəm Allahverdiyeva şübhəli şəxs qismində saxlanılıb.

Faktla bağlı Neftçala Rayon Prokurorluğunda araşdırma aparılır.