"Beniz" sevgilisini qorxudaraq 1 milyon tələb edib? | Məhkəmədə yaşananların detalları

"Beniz" ləqəbli tanınmış tiktoker Aybəniz Xəlilovanın cinayət işi üzrə ilk məhkəmə hazırlıq iclası keçirilib.

Bakı Ağır Cinayətlər Məhkəməsinin hakimi Fəxri Məmmədovun sədrliyi ilə baş tutan prosesdə təqsirləndirilənin anket məlumatları dəqiqləşdirilib.

Hazırlıq iclasında müəyyən anket məlumatlar dəqiqləşdirilmədiyindən cinayət işinin məhkəmə baxışına verilməsi təxirə salınıb.

Təqsirləndirilən tiktokerin vəkili iclasın qapalı keçirilməsi və jurnalistlərin prosesdə iştirak etmələrinə məhdudiyyət qoyulması ilə bağlı vəsatətlə çıxış edib.

Hakim prosesin qapalı keçirilməsinə görə təqdim edilən vəsatətin müzakirəsini açıq saxlasa da, jurnalistlərin iclasda iştirakına məhdudiyyətin qoyulmasını təmin etməyib. Hazırlıq iclasının davamı iyunun 10-na təyin edilib.

Qeyd edək ki, "Beniz" ləqəbli tiktoker barəsində sevgili olduğu iddia edilən Xalid Kərimov Suraxanı Rayon Polis İdarəsinə şikayət edib və hüquq-mühafizə orqanı tərəfindən tiktoker barəsində şikayətçinin təqdim etdiyi sübutlar əsas götürülərək Cinayət Məcəlləsinin 182.2.2 və 182.2.4-cü – hədə-qorxu ilə tələb etmə maddələri ilə cinayət işi başlanıb.

Şikayətçi ərizəsində göstərib ki, Aybəniz Xəlilova ondan hissə-hissə olmaqla hədə-qorxu gələrək 836 min manat pul alıb. Onun barəsində Suraxanı Rayon Məhkəməsinin qərarı ilə həbs qətimkan tədbiri seçilib.