"Bir də onu gördük ki, aşıb" | Külək bir sıra bölgələrdə fəsadlar törətdi - Baku TV

Mingəçevirdə güclü külək irigövdəli ağacların aşmasına səbəb olub. Yağışdan sonra başlayan külək şəhərin Əliağa Vahid küçəsində iki qovaq ağacını kökündən qoparıb. Təbiət hadisəsi zamanı xəsarətalan olmasa da, piyadaların və avtomobillərin hərəkətində çətinlik yaranıb.

Hadisə şahidi olan sakinlərdən biri vəziyyəti belə təsvir edib:

“Eyvanda oturub çay içirdim. Birdən güclü səs eşitdim, işıqlar da söndü. Çölə çıxanda ağacın aşdığını gördüm”.

Güclü külək İsmayıllı rayonunda da bir sıra fəsadlara yol açıb. Qəfil başlayan külək nəticəsində Heydər Əliyev və Həsən bəy Zərdabi küçələrində irigövdəli ağaclar aşıb. Nəticədə, qeyd olunan ərazilərdə nəqliyyatın və piyadaların hərəkəti təxminən iki-üç saat müddətinə məhdudlaşıb.

Qeyd edək ki, aidiyyəti qurumlar dərhal əraziyə cəlb olunub və yaranmış fəsadların aradan qaldırılması istiqamətində zəruri işlər görülüb.