"Obyektə girib, partlayıb" | Toydan qayıdan musiqiçinin şoka salan ölümü

Salyanın Yolüstü kəndində ağır yol qəzası baş verib.

Rayonun Qarabağlı kənd sakini, 38 yaşlı Emil Əzizov idarə etdiyi "Mercedes" markalı avtomobillə hərəkətdə olarkən idarəetməni itirib və yol kənarındakı avtoyuma məntəqəsinə çırpılıb.

Zərbənin gücündən maşın dərhal alovlanıb və partlayış baş verib. Nəticədə sürücü avtomobilin içərisində yanaraq həyatını itirib.

Fövqəladə Hallar Nazirliyinin Mətbuat Xidmətindən verilən məlumata görə, yanğın nəticəsində avtomobil tamamilə yanıb.

Avtoyuma məntəqəsinin dam örtüyünün taxta atmaları 3 kvadratmetr sahədə, xarici divar boyunca keçən elektrik kabeli isə 2 paqonometr məsafədə yanıb. Hadisə yerinin kəşfiyyatı zamanı sürücünün yanmış meyiti aşkar edilərək aidiyyəti üzrə təhvil verilib. Obyektin digər hissəsi yanğından mühafizə olunub.

Hadisə nəticəsində həlak olan Emil Əzizovun musiqiçi olduğu məlum olub. O, Ağcabədidə toyda iştirak edib və gecə saatlarında yaşadığı rayona qayıdarkən qəzaya düşüb.

Faktla bağlı araşdırma aparılır.