"TikTok"da söyüşə görə qazini qətlə yetirən şəxsə hökm oxundu

“TikTok” sosial şəbəkəsində qarşı tərəfə söydüyünə görə paytaxt sakini Qarabağ qazisi 32 yaşlı Natiq Ramazanov qətlə yetirilib.

Hadisə ilə bağlı Baş Prokurorluğun məlumatında bildirilir ki, 2021 ci il noyabrın 9 da paytaxtın Nizami rayonu Qara Qarayev prospekti 37 ünvanında qeydə alınan bıçaqlanma zamanı paytaxt sakini Natiq Ramazanov xəstəxanaya aparılarkən kəskin qanitirmədən yolda dünyasını dəyişib.

İbtidai istintaqın araşdırmaları zamanı müəyyən edilib ki, tərəflər arasında mübahisə “TikTok” sosial şəbəkəsində söyülən söyüşə görə olub.

Qətli törətməkdə şübhəli şəxs kimi Ağdam rayon sakini 39 yaşlı Əli Musayev saxlanılıb. Hadisə zamanı qətlə yetirilən şəxsin meyitinin müayinəsi zamanı o da müəyyən edilib ki, Natiqin ölümünə səbəb sağ bud nahiyəsində arteriyanın kəsilməsi zamanı yaranmış kəskin qanitirmə olub.

Nizami Rayon Prokurorluğunda tamamlanan cinayət işinin məhkəmə istintaqı Bakı Ağır Cinayətlər məhkəməsində baş tutub. Əli Musayevin əməli Cinayət Məcəlləsinin 126.3 (qəsdən sağlamlığa ağır zərər vurma, ehtiyatsızlıqdan zərərçəkmişin ölümünə səbəb olduqda) maddəsi ilə tövsif olunması düzgün hesab olunub. Onun barəsində hökm çıxarılaraq cəzasını ümumi rejimli cəzaçəkmə müəssisəsində çəkməklə 9 il azadlıqdan məhrum edilib.