"Yeni klinika"dakı insident necə baş verib?

“Yeni klinika”da tibb işçisi ilə pasiyent arasında insident olub.

Bu barədə klinikanın İctimaiyyətlə əlaqələr və marketinq şöbəsinin müdiri İlham Məmmədov məlumat verib.

O bildirib ki, bir neçə gün öncə səhər saat 07:00 radələrində müayinə üçün müraciət edən Elxan Hüseynbaba oğlu Hüseynov adlı şəxs klinikanın növbə gözləmə aparatından özü ilə yanaşı, müəssisəyə gəlməyən daha 3 nəfər üçün də növbə götürmək istəyib.

İ.Məmmədovun sözlərinə görə, vətəndaş qeydiyyatçının əlində olan növbə sənədlərini almaq üçün üzərinə hücum edərək ona zor tətbiq edib, sağlamlığına zərər yetirib: “Bu faktla əlaqədar olaraq məhkəmə-tibbi ekspertiza keçirilib. Bundan əlavə, E.Hüseynov qanunvericiliyin tələblərinə zidd olaraq heç bir icazə olmadan gizli surətdə müəssisənin daxilində video və foto çəkilişlər edib”.

Həmçinin qeyd edilib ki, E.Hüseynovun cinayət məsuliyyətinə cəlb olunması üçün Bakı Şəhəri Nizami Rayon Prokurorluğuna müraciət edilib. Hazırda ibtidai araşdırma aparılır.