Rusiyadan dəhşətli zərbələr | Azərbaycanlı tələbə qız faciəvi şəkildə həlak oldu - Baku TV

Rusiya Ukraynanın Zaporojye, Xerson, Dnepropetrovsk və Xarkov vilayətlərinə hücum edib. Nəticədə 7 nəfər ölüb, 56 nəfər yaralanıb.

Bu barədə Ukrayna mediası adıçəkilən vilayətlərin administrasiya rəhbərlərinə istinadən xəbər yayıb.

O cümlədən Xarkov Vilayət Hərbi Administrasiyasının rəisi Oleq Sinequbov bildirib ki, Rusiya qoşunları raketlər, idarəolunan aviabombalar və müxtəlif tipli pilotsuz uçuş aparatları ilə Xarkova və vilayətin 29 yaşayış məntəqəsinə zərbələr endirib. Nəticədə 4 nəfər ölüb, 24 nəfər, o cümlədən 2 uşaq yaralanıb.

Həlak olanlar arasında azərbaycanlı 23 yaşlı Fatimə Hüseynova da var. Yaxınlarının verdiyi məlumata görə, o, tibbi dərəcə almaq üçün Azərbaycandan Xarkova gedib. Məzun günündən bir gün əvvəl rəfiqələri ilə bayram fotosesiyası çəkmək üçün şəhərə çıxıb. Bu zaman rus ordusu Xarkova idarə olunan aviabombalarla zərbələr endirib. Hücum zamanı gənc Fatimə ölümcül yaralanıb.

Yanında məzun papağı tapılan gənc tələbənin bədəninin 90%-i ağır yanıq xəsarətləri alıb. O, xəstəxanaya çatdırılsa da, həyatını xilas etmək mümkün olmayıb.