Samuxdakı yas mərasimində paylanan halva kütləvi zəhərlənməyə səbəb oldu - Baku TV

Samuxda kütləvi zəhərlənmə hadisəsi baş verib.

Hadisə rayonun Alıuşağı kəndində qeydə alınıb.

İlkin məlumata görə, 10 nəfər qida zəhərlənməsi diaqnozu ilə Gəncə Birləşmiş Xəstəxanasının nəzdində fəaliyyət göstərən Abbas Səhhət adına xəstəxananın Yoluxucu xəstəliklər şöbəsinə yerləşdirilib.

Tibb müəssisəsinin həkim-infeksionisti Əli Quliyevin sözlərinə görə, xəstələrin hamısına zəruri tibbi yardım göstərilib:

“Hazırda onların müalicəsi davam etdirilir. Bir neçə saatdan sonra vəziyyətləri tam stabilləşərsə, evə buraxılacaqlar. Ağır vəziyyətdə olan xəstə yoxdur. Xəstəxanaya daxil olarkən onların vəziyyəti əsasən orta ağır qiymətləndirilib. Hazırda isə hamısının vəziyyəti qənaətbəxşdir”.

Zəhərlənənlərin sözlərinə görə, kənd sakinlərindən biri halva bişirərək qonşulara paylayıb. Həmin evin sakinləri və halvadan yeyən qonşular özlərini pis hiss etdikləri üçün xəstəxanaya müraciət ediblər.