Şəmkirdə 36 inək bir gündə tələf oldu | AQTA hərəkətə keçdi

Şəmkirdəki fermaların birində 36 baş iribuynuzlu heyvan bir günün içində qəfildən tələf olub.

Təsərrüfat sahibi Anar Məmmədovun sözlərinə görə, hadisə heyvanlar xəstəliklərə qarşı dərmanlandıqdan sonra baş verib:

“Neastol” adı ilə aldım, 48 heyvanı çimizdirib çölə buraxdım. Bir saat ərzində 36 baş iribuynuzlu heyvan qırıldı. Mən bilmək istəyirəm ki, bu dərmanın mənbəyi haradır, harada istehsal olunur?”.

Heyvandarlıqla məşğul olan digər təsərrüfat sahibləri isə deyirlər ki, Anar Məmmədovun istifadə etdiyi dərmanın “Neastol” məhlulu olması, ümumiyyətlə, şübhə doğurur.

Hadisədən dərhal sonra Azərbaycan Qida Təhlükəsizliyi Agentliyi və Baytarlıq Xidmətinin yerli bölmələri tərəfindən müvafiq addımlar atılıb.

Qeyd edək ki, heyvanların kütləvi tələf olmasının dəqiq səbəbi AQTA-nın apardığı laborator müayinələrin nəticələri əsasında bilinəcək.