Şəmkirdə tükürpərdən hadisə | DİN açıqlama yaydı

Şəmkir sakini odlu silahdan açılan atəş nəticəsində yaralanıb.

Hadisə rayonun Şiştəpə kəndində, yol kənarındakı marketin qarşısında qeydə alınıb.

26 yaşlı Zabil Aslanov bir neçə güllə yarası ilə əvvəlcə Şəmkir Rayon Mərkəzi Xəstəxanasına, daha sonra isə Gəncə şəhərində yerləşən özəl xəstəxanalardan birinə çatdırılıb.

Daxili İşlər Nazirliyinin Mətbuat Xidmətinin Gəncə regional qrupundan verilən məlumata görə, Şəmkir sakinləri Babək və Bahəddin Bayramlı qardaşları cinayəti törətməkdə şübhəli bilinirlər.

Bildirilib ki, polis əməkdaşlarının keçirdikləri əməliyyat-axtarış tədbirləri nəticəsində cinayəti törətməkdə şübhəli bilinən rayon sakini Babək Bayramlı və qardaşı Bahəddin Bayramlı şübhəli şəxs qismində saxlanılıb. Bahəddin Bayramlının avtomobilinə baxış keçirilən zaman 1 ədəd “Kalaşnikov” markalı avtomat aşkar olunaraq götürülüb.

İlkin ehtimala görə, tərəflər arasındakı ədavət 2 ildir davam edir və cinayət hadisəsi də məhz bu zəmində törədilib. Faktla bağlı araşdırmalar davam etdirilir.