Sinqapurdan Londona gedən təyyarə Bakıda qəza enişi edib

Dekabrın 23-də səhər saatlarında Heydər Əliyev Beynəlxalq Hava Limanında “Qantas Airways” aviaşirkətinə məxsus təyyarənin qəza eniş etməsi səbəbindən həyəcan siqnalı verilib.

Bu barədə Heydər Əliyev Beynəlxalq Hava Limanının sosial şəbəkə hesabında məlumat verilib. Bildirilib ki, Sinqapur-London marşrutu ilə hərəkət edən “Airbus A380” təyyarəsi yük bölməsində yaranan tüstü səbəbindən Bakı hava limanına qəza eniş sorğusu göndərib. Təyyarə yerli vaxtla saat 07:08-də uğurla eniş edib, hadisə zamanı xəsarət alan olmayıb. Təyyarədə 356 sərnişin olub.

Bakı aeroportunda elan edilən həyacan siqnalı ilə əlaqədar bütün qəza-xilasetmə xidmətləri hazır vəziyyətə gətirilib. Hazırda hava gəmisinə baxış keçirilir və hadisənin baş verməsinin bütün səbəblərini müəyyən etmək üçün zəruri tədbirlər kompleksi təşkil olunur.