Şirvanda qonşu qonşunun həyatına son qoydu

Şirvanda qonşular arasında uzun illərdir davam edən torpaq davası qanla bitib. Dəhşətli hadisə rayonun Çılpaqlı qəsəbəsində qeydə alınıb.

Şirvan sakini 51 yaşlı Elşən İslamov mübahisə zəminində qonşusu 60 yaşlı Yavər Bağırovu boğazından bıçaqlayıb. Yavər Bağırov xəstəxanaya aparılarkən yolda dünyasını dəyişib.

Qeyd edilir ki, onlar arasında əvvəldən torpaq üstündə ədavət olub. Hadisədən bir müddət əvvəl Elşən İslamov Yavər Bağırovun işlətdiyi mağazaya gələrək ondan siqaret və çörək alıb. Bu vaxt aralarında yaranan mübahisə zamanı biri digərini təhqir edib. Hadisə də elə bundan sonra baş verib.

Keçirilən əməliyyat tədbirləri nəticəsində hadisə yerindən qaçan Elşən İslamov polis tərəfindən saxlanılaraq istintaqa təhvil verilib.

Faktla bağlı cinayət işi açılıb.