Sumqayıtda ağır yol qəzası baş verib

Sumqayıtda 6 nəfərin xəsarət alması ilə nəticələnən yol-nəqliyyat hadisəsi baş verib.

Qəza Koroğlu prospekti ilə Sərvər Bədəlbəyli küçəsinin kəsişməsində, Sumqayıt Dövlət Universitetinin qarşısında qeydə alınıb.

Belə ki, “Toyota Prius” markalı avtomobillə “Hyundai Santa Fe” markalı avtomobil toqquşub. Hadisə nəticəsində “Toyota”da olan sərnişinlər – 57 yaşlı Xaləddin Məmmədov, onun həyat yoldaşı 54 yaşlı Nuridə Cəfərova, 31 yaşlı Ləman Məmmədova, 28 yaşlı Şəbnəm Quliyeva, 7 yaşlı Oktay Məmmədov, 38 yaşlı Mirzə Dadaşov ağır xəsarətlər alıblar.

Hadisə yerinə Fövqəladə Hallar Nazirliyinin, Sumqayıt Şəhər Polis İdarəsinin əməkdaşları, Təcili Tibbi Yardım Stansiyasının briqadaları cəlb olunub.

Yaralılar dərhal Sumqayıt Şəhər Təcili Tibbi Yardım Xəstəxanasının Travmotologiya şöbəsinə yerləşdiriliblər. Faktla bağlı araşdırma aparılır.