Sumqayıtda ana və 2 övladı 11 gündür itkin düşüb | Qonşular danışdı

Sumqayıtda ana və iki azyaşlı övladı 11 gündür ki, itkin düşüb.

Hadisə 4-cü mikrorayonda, 24 saylı binada qeydə alınıb. Onlar sonuncu dəfə mayın 2-də şəhərin təhlükəsizlik kamerasına düşüblər.

Sumqayıt şəhəri, Hacı Zeynalabdin qəsəbəsində fərdi yaşayış evində yaşayan Sənəm Həsənova 3-cü polis bölməsinə müraciət edərək bildirib ki, mayın 2-də 33 yaşlı gəlini Şəbnəm Alıyeva azyaşlı iki övladı – 12 yaşlı Ayanı və 11 yaşlı Ayxanı 4-cü mikrorayonda yaşadıqları evdən götürərək gedib və bir daha geri qayıtmayıb.

“Gəlinin özünün problemi yox idi. Deyilənə görə, oğlu xəstədir, bəlkə də, ona görə dərddən başını götürüb qaçıb. Yoldaşı Rusiyaya işləməyə gedib. Çox yaxşı ailədir, bu hadisə necə baş verdi, bilmirik. Bir il olar ki, bura köçüblər. Bu müddət ərzində onların səsini eşitmədik”, – qonşuları söyləyiblər.